Рон Хауард, режисерот на филмскиот хит "Кодот на Да Винчи", повторно е во центарот на вниманието. Освен што е актуелен со идејата за екранизација на уште еден бестселер на Ден Браун, романот "Ангели и демони", тој поради својот нов проект дојде во судир со Ватикан. Имено, Ватикан му го забранил на режисерот снимањето на клучните сцени за "Ангели и демони" во двете цркви "Санта Марија дел Пополо" и "Санта Марија дела Виторија".

Иако дејството во филмот се одвива во Рим, црковните веродостојници тврдат дека нема да му дозволат на холивудскиот режисер да и пријде на ниту една од нивните цркви.

- Обично го читаме сценариото за некој филм пред да дадеме дозвола за снимање во некоја од црквите, но во овој случај тоа и не беше неопходно. Доволно беше да го чуеме името на Ден Браун - објасни претставникот за медиуми на Ватикан.

По ваквата реакција на Ватикан, Хауард изјави ќе изгради имитација на Ватикан во некое од холивудските студија. Веќе со години постои неразбирање на релација Холивуд-Католичка црква, а пред да почне снимањето на првиот бестселер на Ден Браун, "Кодот на Да Винчи", многумина се спротивставуваа на самата екранизација на ова дело затоа што ги подривало темелите на христијанството. Иако критиката го дочека на нож, филмот постигна голем успех на киноблагајните, па Хауард и Браун одлучија да ја продолжат соработката, пренесувајќи ја на филмското платно и книгата "Ангели и демони". A денес, за жал, секој скандал резултира со многу, многу милиони долари, па истото може да се очекува и од овој филм...

Том Хенкс повторно ќе се најде во улога на професорот Ленгдон, а неговата мисија во овој филм ќе биде, по малку иронично, да го спаси Ватикан од уништување.