Крими-мистеријата "Rear window" е мајсторско дело на мајсторот Алфред Хичкок. Напнат и преполн со интелигентни дијалози, овој филм е интригантна визуелна студија на опсесивната човекова љубопитност. Филмот е повеќе мистерија отколку трилер но толку многу е вложено во нијансирање на ликовите што буквално тоа е доволно за сосема да се внесете во филмот.
Во центарот на приказната е фоторепортерот Л.Б. Џеферис (Џејмс Стјуард) кој е врзан за количката во својот стан. Во рок од една минута без ниту еден изустен збор го дознаваме она што е најважно за главниот јунак - неговата љубов кон фотографијата. И самиот Хичкок знае дека токму фотографијата кажува многу повеќе од зборот. Значи, единствена занимација на главниот јунак е набљудувањето на соседите од околните станови. Така, тој ќе почне да се сомнева дека соседот Ларс, трговец со накит, ја убил сопругата, но, никој нема да му верува. Тогаш пред него ќе се појави дилемата - дали убиството навистина се случило или пак тој почнува да си замислува работи кои воопшто не се случиле. Интересно е што камерата најчесто е поставена од аголот на протагонистот и единствениот поглед што гледачите го имаат за животот на неговите соседи е тој од неговиот прозорец. На тој начин публиката е целосно сплотена со неговиот воајеристички начин на живот. Овој филм се наоѓа меѓу првите 20 најдобри филмови досега направени според листата на IMDB и според многумина е култно остварување на Хичкок. А кога сето тоа ќе го дополниме со убавината и елеганцијата на прекрасната Грејс Кели, тогаш бидете сигурни ова е филм кој не смеете да го пропуштите.

Оригинален наслов: Rear Window
Улоги: James Stewart, Grace Kelly, Wendell Corey, Thelma Ritter, Raymond Burr, Judith Evelyn
Режија: Alfred Hitchock
Жанр: мистерија, трилер, романса
Година на производство: 1954