За Брајан де Палма, ученикот на Хичкок, многу често се вели дека е „неморален и развратен" Хичкок, а тоа е опис што извонредно му одговара. Сепак, да се нарече Де Палма верен следбеник на стилот на Хичкок е сосема погрешно. Де Палма со текот на годините изгради сосема свој стил и стана мајстор за правење стилизирани трилери и еротски хорори. Филмот „Дублер" е најексплицитен приказ на воајеристичкиот стил на Де Палма, заради кој заработи и оптужба за порнографија и беше одбиен од меинстрим елитата во средината на 80-тите години, но од друга страна токму овој филм ја вивна Мелани Грифит меѓу ѕвездите.
Филмот ја следи приказната на Џејк Скали (Крег Васон), актер од хорор-филм, што западнал во тежок период од животот. На една филмска аудиција тој се среќава со стар пријател кој му помага да се смести во луксузен дом, но набргу станува опседнат со користењето на телескопот и гледа во спалната соба на сосетката која, сосема случајно, секоја вечер, изведува стриптиз пред прозорецот. Колку повеќе ја гледа толку повеќе таа станува негова деноноќна опсесија и решава по било која цена, да ја запознае. „Дублер" е едно од неколкуте остварувања на Де Палма што ја покажуваат неговата моќ да го долови еланот на Хичкок, а, сепак, да остане доследен на својот стил.

Оригинален наслов: Body Double
Улоги: Craig Wasson, Gregg Henry, Melanie Griffith, Deborah Shelton, Guy Boyd, Dennis Franz, David Haskell, Rebecca Stanley
Режија: Brian De Palma
Жанр: трилер, драма, мистерија
Година на производство: 1984