Иако направен само пред една деценија, сепак овој филм веќе влезе помеѓу легендарните филмови во американската кинематографија. Приказната е врзана за американската фамилија Бурнамс која живее во предградието. Средновечниот Лестер пак минува низ тешка криза на идентитетот - сопругата го игнорира, ќерката го мрази а на работа му е ужасно досадно. Откако ќе ја запознае преубавата другарка на својата ќерка, тој буквално се опседнува со тинејџерката и  сонува за страстен секс со неа, инаку мажоретка во средното училиште. Тој одлучува да си го промени животот од темел - почнува да вежба, да се облекува фраерски и да пуши трева. Дава отказ на работа и се вработува во фаст фуд ресторан. Неговата сопруга пак продава недвижности и мантри за мотивација и вози „мерцедес". Исто така, влегува во афера со својот колега Бади. Во меѓувреме, нивната ќерка тинејџерка почнува врска со момче од соседството, кој е дилер на дрога и воајер со камера. На моменти, филмот станува премногу претенциозен, но одличните изведби на Кевин Спејси и Анет Бенинг нагло ве враќаат во реалноста. Филмот доби пет Оскара меѓу кои и оние за најдобар филм и најдобра режија.

Оригинален наслов: American beauty
Улоги: Kevin Spacey, Annette Bening, Thora Birch, Wes Bentley, Mena Suvari
Режија: Sam Mendes
Жанр: комедија, драма
Година на производство: 1999