Денес во 20 часот во Кинотеката на Македонија во рамките на осмото издание на OFF-Fest, во Кинотеката на Македонија ќе биде прикажан документарниот филм „Пети Смит - сон на животот“ (Patti Smith: Dream Of Life) на режисерот Стивен Себринг. 

„Не постои човек што е само едно. Јас не сум само моден фотограф. Пети Смит дефинитивно не е само рок-икона. Таа е многу повеќе од тоа. За мене, овој филм претставува обид да се открие која е и што е Пети Смит“. - Стивен Себринг

Интересно е дека филмот е снимен во период од единаесет години и е дебитантски филм на уметникот и фотограф Стивен Себринг. "Сон на животот" претставува оригинален и интимен портрет на легендарната пејачка, музичарка, поетеса и активистка. Филмот е своевиден поглед низ клучалка во филозофијата и уметноста на Пети Смит, следејќи ги нејзините почетоци како панк-икона во седумдесеттите, преку енергичните живи настапи и неформалната комуникација со пријателите и соработниците (Филип Глас, Мајкл Стајп итн.), па сè до предизвиците на секојдневниот живот и прераната смрт на нејзиниот сопруг Фред ‘Соник’ Смит од MC5, и смртта на братот Тод. Преку прекрасната фотографија (црно-бела и во боја), Себринг ја доловува сржта на природата на оваа витална и мошне значајна американска уметница. Трогателна посвета, едновремено моќна, забавна, сурова и оригинална, како и главната протагонистка во филмот.

Средбата со Пети Смит, а особено нејзините концерти, го инспирираа да се впушти во оваа 11-годишна авантура наречена „Пети Смит - сон на животот“, што може да се смета за своевиден експеримент, со оглед на неговиот скромен бекграунд како филмски режисер. Во меѓувреме, Себринг режираше и два кратки филма за линијата DKNY на Дона Каран, кои поминаа одлично кај критиката, а беше и автор на неколку фотографски монографии. Неговите фотографии се присутни во книгата на Пети Смит "Patti Smith Complete; Lyrics, Reflections and Notes for the Future", како и на нејзините албуми "Gung Ho", "Land" и последниот "Twelve" од 2007 година.

Соработката со Пети Смит продолжува со продукцијата на уметничката инсталација "Objects of Life", како и со создавањето на книгата "Patti Smith: dream of life" којашто претставува, всушност, хроника на многубројните моменти, музички транскрипти и необјавени фотографии што произлегоа од необичното искуство на снимањето на овој филм.

Оригинален наслов: Patti Smith: Dream Of Life
Режија: Steven Sebring