Abre los ojos, 1997
Режија: Алехандро Аменабар (Alejandro Amenábar)
Сценарио: Алехандро Аменабар, Матео Гил (Alejandro Amenábar, Mateo Gil)
Директор на фотографија: Ханс Бурман (Hans Burman)
Улоги: Едуардо Нориега, Пенелопе Круз, Чете Лера, Феле Мартинез, Најва Нимри (Eduardo Noriega, Penélope Cruz, Chete Lera, Fele Martinez, Najwa Nimri)

ОТВОРИ ГИ ОЧИТЕ е филм за згодниот 25-годишен Цезар, кој има успешна кариера, скапи автомобили, добра ергенска гајба и цела војска убави и податливи жени на свое располагање. За жал, тој не може да раскине со својата последна девојка – Нурија. Вечерта кога го слави својот роденден, со помош на атрактивната Софија, девојка на неговиот пријател Пелајо, тој успева накратко да се ослободи од Нурија, но следното утро мора да се соочи со неа и тоа во нејзиниот автомобил. Веднаш потоа Цезар се буди со маска на своето лице за да ги сокрие ужасните лузни и се наоѓа во затвор заради испитување под обвинение за убиство. Но, не се сеќава како стигнал дотаму. Трилерот на Аменабар ја извртува перцепцијата за реалноста на гледачот и на главниот јунак со серија збунувачки пресврти во приказната. Во 2001 е снимен американскиот римејк на филмот, под наслов НЕБО ОД ВАНИЛА (Vanila Sky) со Том Круз, Пенелопе Круз и Камерон Дијаз во главните улоги.

Алехандро Аменабар (1972) е од шпанско-чилеанско потекло. Детството и младоста ги минува во Шпанија. Студиите по режија не ги довршува, сметајќи ги за губење време, и рано почнува да снима и режира. Го напишал, продуцирал и режирал својот прв краток филм уште на 19-годишна возраст, а на 23 го режира ТЕЗА, својот прв долгометражен филм. За сите свои филмови, тој е авторот и на сценаријата, и на музиката. Од другите шпански режисери, според американските критичари, се разликува по тоа што не се занимава со националните фобии или блиското минато, туку смело се втурнува во фантазмагорични, психолошки и надреални теми. Во своите филмови не дава одговори, туку поставува прашања што публиката треба да ги одговори. Негови позначајни филмови се ЛУНА (1995), ТЕЗА (1996), ОТВОРИ ГИ ОЧИТЕ (1997), ЈАЗИКОТ НА ПЕПЕРУТКИТЕ (1999), ДРУГИТЕ (2001) и ВНАТРЕШНО МОРЕ (2004).