На 23-24 Октомври, со почеток во 20 часот во Кинотеката на Македонија ќе се одржи 22-то издание на Интернационалниот филмски фестивал - ОСФАФ, фестивал на алтернативен (непрофесионален) и студентски филм.

Официјалната програма и наградите на фестивалот ќе бидат истакнати на 22-ри Октомври на официјалната веб-страна на фестивалот: www.osfaf.org.mk . Стручното интернационално жири ќе ја одбере програмата која ќе биде поделена во две одделни проекции. Овогодишното жири е во состав: Илинденка Петрушева (Македонија), Томислав Готовац (Хрватска), Станимир Трифонов (Бугарија), Миле Грозданоски (Македонија) и Виктор Иванов (Македонија). На фестивалот пристигнаа вкупно 114 филмови од 20 земји од светот. Најзастапени се играниот и анимираниот филм.  Сите подетални информации можете да ги добиете на веб-страната на фестивалот.

ОСФАФ се одржува веќе четврта година по ред од кога беше возобновен. Фестивалот е во организација на Академскиот кино клуб од Скопје, и е помогнат од Филмскиот фонд на Македонија и од традиционалните партнери на ОСФАФ. Фестивалот е одлична можност македонската публика да ги види најновите студентски и непрофесионални филмски остварувања на автори од целиот свет. Како и минатите изданија, така и овој пат, организаторите на фестивалот се надеваат дека ќе ги задоволат очекувањата на фановите на независниот филм, и на пошироката филмска публика која сака да види интересно парче краток филм.